Bayer Leverkusen synon të vazhdojë serinë pozitive të rezultateve, teksa të shtunën përballet me Union Berlin në një ndeshje që mund të shënojë fitoren e tretë radhazi në të gjitha garat për skuadrën e drejtuar nga Xabi Alonso.

Kampioni aktual i Gjermanisë vjen nga dy fitore mbresëlënëse: një triumf 5-2 ndaj Heidenheim në Bundesligë dhe një fitore të thellë 5-0 ndaj RB Salzburg në Champions League. Por pavarësisht suksesit të fundit, Alonso ka theksuar se vazhdimësia mbetet një sfidë për skuadrën e tij, e cila ka arritur tre fitore radhazi vetëm një herë këtë sezon, në muajin shtator.

“Duam të kemi sërish një ndjesi të mirë”, është shprehur Alonso në konferencën për shtyp. “Pas fitores ndaj Heidenheim, gjërat ishin më mirë dhe pas Salzburgut edhe më mirë. Nesër është një moment i mirë për të treguar se pas dy ndeshjeve të mira, mund të luajmë një të tretë po aq të mirë. Dua një tjetër portë të paprekur.”

Leverkusen aktualisht renditet në vendin e katërt në tabelën e Bundesligës me njëzet pikë, por ka vuajtur për vazhdimësi këtë sezon, duke fituar vetëm një nga katër ndeshjet e fundit në kampionat. Skuadra ndodhet nëntë pikë larg liderit Bayern Munich, që të shtunën përballet me Borussia Dortmund.

Ndaj Union Berlin, Alonso pret një sfidë të vështirë dhe fizike. “Presim diçka ndryshe kundër Union dhe një sfidë të madhe përpara nesh”, ka thënë ai. “Duhet të jemi të përgatitur për një ndeshje fizike”./rtk